Björgvin Sigurðsson

Að tilnefna og kjósa sjálfan sig

2004-02-14T00:11:00.000Z

Hlustendaverðlaun FM957 voru afhent með viðhöfn í gær. Það er allt saman gott og blessað, bara verst að sú útvarpsstöð hafi úr einhverjum hlustendum að moða sem sjá um að kjósa. En hvað um það. Já og meðan ég man. Vinur minn fór því miður á hátíðina. En... hverjir sjá um að tilnefna þá sem kjósendur geta kosið? Er það ekki útvarpsráð FM957 eða einhver álíka nefnd, ég alla vega get mér til um að fyrirkomulagið á tilnefningum sé á þá leið. Mikið af þeim poppurum sem tilnefndir eru vinna eða hafa unnið á stöðinni. Flestar hljómsveitirnar eru með útgáfusamning hjá Skífunni sem er líkt og FM957 í eigu Norðurljósa (Hvað er ekki í eigu Norðurljósa?). Þarna sem sagt tilnefna einhverjir njólar sjálfa sig og láta svo þá bjána sem eru nógu vitlausir til að fylgjast með því sem fram fer á stöðinni kjósa á milli sín og vina sinna. Mér finnst þetta asnalegt. Ég ætla að líkja þessari samkomu við það að fyrirtækið sem ég vinn hjá þegar ég er ekki skóla efndu til sambærilegrar verðlaunahátíðar. Ég vinn hjá Fagmál. Starfsmenn fyrirtækisins starfa við húsamálun og fyrirtækið gefur sig út fyrir að vera svona húsamálunarfyrirtæki. En hvað um það. Hlustendaverðlaun FM957 eru svona eins og Fagmál efndi til Málaraverðlauna Fagmáls. Við myndum að sjálfsögðu tilnefna sjálfa okkur og fólk fengi að gera upp á milli okkar félaganna. Hægt væri að efna til kosningar í fjölmörgum flokkum t.d:
Skurður ársins!
Rúllun ársins!
Besta áferðin!
Slípun ársins!
Kíttun ársins!
Best málaði veggurinn! (sbr, Lag ársins)
Best málaða húsið! (sbr. Plata ársins)
Kynþokkafyllsti málarinn! (Gunni myndi rúlla því upp)
Besti glugginn!
Besti nýliðinn!
Málari ársins! (sbr. Söngvari/söngkona ársins)
Fyrirtækið gæti svo státað sig af því í auglýsingum að það hefði hreinlega sópað til sín verðlaunum á Málaraverðlaunum Fagmáls. Ekki ónýt auglýsing það.

Jæja...

2004-01-29T21:25:00.000Z

Það er nú ansi langt síðan ég bloggaði síðast. Svei mér þá, það var í fyrra. Merkilegt. Búin að koma jól og fara jól, koma áramót og fara áramót. Og eflaust margt fleira búið að koma og fara. Þannig er nú það. Allt kemur og fer. Nú síðast kom þorrinn. Helv#$%& þorrinn. Hvað er málið með þennan þorra? Til hvers eiginlega að halda upp á þorrann? Fólk getur bara borðað vondan mat á hvaða tíma árs sem er og ekki verið að velta öllu Íslandi upp úr súr. Fyrir mér er þorrinn ekki neitt nema ávísun á það að allt of margir góðir Íslendingar hætti lífi sínu við það að éta handónýtan "mat". Ég efast um að þessir áhættufíklar væru tilbúnir að éta rollu ef ég migi...... Nei best að sleppa þessu. Og svo bjóða leikskólar saklausum börnum (flest eru þau óvitar) upp á súrmat. Spila með aumingja börnin til að borða óþverran. Og blessuð börnin leggja allt sitt traust á leikskólakennarann sinn. Það ætti að vera heilt námskeið í KHÍ sem felst í því að kenna verðandi leikskólakennurum að það er ljótt að plata lítil börn til að borða vondan mat. Guð segir að það sé ljótt að ljúga. Og ekki lýgur hann blessaður karlinn. Nei best að hætta áður en sleggjurnar verða of stórar og þungar.
Af því að ég minntist á jólin. Það er til jóla-allt. Jólatré, jólasveinar, jólaskraut, jólagjafir, jólaöl, jóladagskrá sjónvarpsstöðva o.s.frv. Jólalistinn er endalaus (sko það er meira að segja til jólalisti). Eitt finnst mér þó hvað undarlegast og það er jólaklósettpappír. Jólin, þessi hátíð ljóss og friðar, eru þá ekki merkilegri en svo að við tökum þau og skeinum okkur á þeim. Annars finnst mér jólin fín.
Ef einhverjum finnst þessi jólahugleiðing mín vera helst til seint á ferðinni þá get ég tekið undir það. Aftur á móti bið ég þann sama að skoða húsið sitt vel og vandlega. Miðað við hversu mikið af jólaskrauti hangir enn uppi er mjög líklegt að sá hinn sami og þetta les hafi hreinlega gleymt að taka niður sitt jólahafurtask og skraut.
Að lokum vil ég hvetja alla þá sem hafa nennt að lesa þetta til að panta sér ógrynni af pizzum á þorranum. Pizzan er ósúr, bragðgóð og nýbökuð.

Djö......

2003-12-10T18:22:00.000Z

Jæja, langt síðan ég hef bloggað. Brjálað að gera við próflestur. Búin að fá einkunn úr einu prófi, fékk 9 í rúmfræði, ekkert að því.
Annars blæs ekki byrlega hjá mínum mönnum í Palace. Kíkið hér til að sjá nákvæmlega hvað ég meina.
Áfram Palace

Völsungar tóku titil

2003-11-30T21:26:00.000Z

Lék með mínu liði á Íslandsmótinu innanhúss um helgina. Skemmst frá því að segja að við urðum Íslandsmeistarar, ekkert að því. Slógum Fram út í 8-liða úrslitum í dag, unnum 4-0. Tókum svo Skagamenn, sigruðum 2-1. Þá var bara úrslitaleikurinn eftir og mættum við, Völsungar, Valsmönnum. Leikurinn var æsispennandi. Valsmenn komust yfir 1-0 en við náðum að jafna fyrir hálfleik. Í seinni hálfleik komust Valsmenn aftur yfir, 2-1, en Völsi náði að jafna 5 sekúndum fyrir leikslok 2-2. Því þurfti að framlengja leikinn. Við skoruðum eitt mark í framlengingunni en Valsarar ekkert. Þar með var það orðið ljóst að við í Völsungi vorum orðnir Íslandsmeistarar í innanhússknattspyrnu 2003. Ég vil óska mér, samherjum mínum og öllum stuðningsmönnum Völsungs til hamingju með titilinn. Fram, Valur og ÍA áttu ekki roð í piltana að norðan og það er bókstaflega ekkert að því, ekki neitt.
Punktur!
Áfram Völsungur.

Kíkt á aðrar síður

2003-11-26T15:05:00.000Z

Ég kíkti á skilasíðu Margrétar Þórisdóttur samnemanda míns. Við erum bæði í námskeiðinu Upplýsingatækni og skólastarf. Síðan hennar er mjög fín, öllum verkefnum gerð góð skil. Bloggið hennar nokkuð gott og gaman að því að hún skuli hafa skellt sér á tónleika með rokkurunum í 200.000 naglbítum. Producer-kynningin um tennurnar sérstaklega góð. Smelltu hér til að skoða síðuna hjá Möggu.
Og svo er bara að muna að bursta vel.

Nauj

2003-11-26T08:21:00.000Z

Djöfull munaði litlu að ég hafi póstað banana-bloggið klukkan tólf á hádegi akkúrat. Það munaði bara einni sekúndu. Nauj.

Loksins

2003-11-26T08:20:00.000Z

Stoke - Palace 0 - 1.
Fín úrslit í gær hjá Palace. Fyrsti sigurinn mjög lengi sem er ánægjulegt. Bíðið þið bara, þeir eiga eftir að verða fleiri, miklu fleiri. Og svo sýndu þeir á sjónvarpsstöðinni Sýn einhverja drasl leiki úr Meistaradeild Evrópu. Hvað er það? Firmakeppni? Af hverju sýna þeir ekki Palace? Ég er viss um að það myndi vekja áhuga hjá fólki á stöðinni.
Áfram Palace

Hver er uppáhaldsmaturinn þinn?

2003-11-21T12:00:00.000Z

Hver hefur ekki þurft að svara þessari spurningu oft og mörgum sinnum. Flestum kann að virðast sem svarið liggi í augum uppi. En reyndin er önnur. Það er að mörgu að hyggja þegar maður svarar þessari spurningu og ótal spurningar aðrar kunna að vakna. Sem dæmi mætti nefna:
Er uppáhaldsmaturinn minn sá matur sem mér þykir bestur á bragðið?
Eða er uppáhaldsmaturinn minn sá matur sem ég borða mest af?
Ég hef velt þessu aðeins fyrir mér og komist að niðurstöðu. Uppáhaldsmaturinn minn er samloka með banana á milli og Kókómjólk að drekka með herlegheitunum. Ástæðan er sú að mér finnst þessi matur mjög bragðgóður og svo það að ég borða mjög mikið af þessum mat. Í framhaldi af þessari uppgötvun langaði mig að kanna aðeins betur hversu mikið ég hef borðað af þessum mat í raun og veru. Niðurstöður úr þeirri óformlegu rannsókn eru eftirfarandi:
Alla mína grunnskólagöngu tók ég samloku með banana og Kókómjólk með mér í nesti. Grunnskólagangan spannaði 10 ár. Lengd grunnskólaársins í dag er 170 dagar en var aðeins styttri þegar ég var í grunnskóla. Ég ætla samt sem áður að gefa mér það að árið hafi verið 170 dagar því suma daga tók ég tvær samlokur með mér í skólann og tvær kókómjólk. Allt í lagi. Þetta gerir 1700 samlokur með banana og 1700 Kókómjólkur-fernur.
Því næst tók við nám í framhaldsskóla. Ég ætla að gefa mér sömu forsendur í þessum útreikningum og í útreikningum fyrir grunnskólann. Skólaárið er aðeins styttra í framhaldsskóla en í grunnskóla en á móti kemur að ég var stærri og mun hungraðari. Sumsé 170 * 4, þar sem ég var fjögur ár í framhaldsskóla. Þetta gerir 680 samlokur með banana og 680 Kókómjólkur-fernur.
Nú er ég í háskóla og enn er samloka með banana og Kókómjólk í skólatöskunni. Ég hef verið eitt og hálft ár í háskóla og oftar en ekki eru tvær samlokur og tvær Kókómjólk meðferðis því ég er svangur að eðlisfari. Þetta gerir 255 samlokur með banana og 255 Kókómjólkur-fernur.
Ef við tökum nú niðurstöðurnar saman sést að ég hef borðað 2635 samlokur með banana og drukkið 2635 Kókómjólkur-fernur á minni skólagöngu (og enn er eitt og hálft ár eftir). Nokkuð gott.
Nú má leika sér aðeins með þessar staðreyndir. Skoðum fyrst Kókómjólkurtölurnar.
2635 Kókómjólkur-fernur gera 658.75 lítra af Kókómjólk. Það er ansi góður árangur. Kókómjólk kaupi ég oftast sex saman í pakka. Það samsvarar því að ég hafi keypt rétt rúmlega 439 pakkningar. Þetta eru merkilegar tölur. Ef ég hefði alltaf keypt kókómjólkina í lengjum, 18 saman í pakka, væri ég búinn að kaupa rúmlega 146 lengjur.
Kíkjum á bananana (skrýtið orð). Ég hef reiknað það út að ég þarf 1 1/2 banana til að gera tvær samlokur. Ég hef því smurt rúmlega 1756 bönunum á brauð. Segjum að meðalbanani sé 200 grömm (hef ekki hugmynd um það og ítrekuð leit á netinu að tölfræði yfir meðalbananann skilaði litlum árangri). Það jafngildir því að ég hafi smurt 351.2 kílóum af bönunum á brauð. Ég vann eitt sinn í Hagkaup. Bananarnir komu í kössum inn í verslunina og voru 25 kíló í kassa. Ég hef því borðað sem nemur rúmlega 14 kössum af bönunum. Það er næstum því heilt bretti.
Ég hef semsagt borðað 351.2 kíló af bönunum og drukkið 658.75 lítra af kókómjólk í skólanum. Já, bara í skólanum. Ég hef ekki tekið inn í útreikningana alla bananana og kókómjólkurnar (sjálfsagt ekki góð íslenska) sem ég hef étið og drukkið utan skóla. Og svo allt brauðið.
Ég er að spá í að leita eftir samningum við þá aðila er framleiða banana og Kókómjólk og athuga hvort þeir séu ekki til í að gera við mig samning, líkt og Adidas gerir við Beckham. Ég gæti leikið í auglýsingum þar sem ég sést háma í mig banana og brauð og þamba kókómjólk í nafni Chiquita eða DelMonte, Myllunnar eða Heimabakarís og Mjólkursamsölunnar. Svo myndi ég að sjálfsögðu alltaf borða þeirra vörur, líkt og Beckham spilar alltaf í skóm frá Adidas. Þetta myndi væntanlega spara mér stórfé þar sem ég myndi fá myndarlega matarstyrki frá viðkomandi fyrirtækjum.
Ég hef ekki þorað að reikna út hvað herlegheitin hafa kostað. Það er gert vegna þess að ég myndi sennilega gráta mig í svefn af skömm yfir því að láta elskulegu móður mína kaupa alla þessa banana, allt þetta brauð og alla Kókómjólkina. Svo ekki sé talað um allan kostnaðinn sem lagður er á herðar mínar, fátæka námsmannsins, nú þegar ég er ekki heima hjá mömmu.
Ég hef því komist að eftirfarandi niðurstöðu. Minn uppáhaldsmatur er:
Samloka með banana á milli og Kókómjólk að drekka.
Ákvörðunin er byggð á því hversu gott þetta er á bragðið og ekki síður því hversu óhemju mikið magn ég hef borðað af þessari fæðu.
Kveðja, Böbbi banani

Rúmfræði

2003-11-20T16:48:00.000Z

Hef verið að vinna í forritinu Geometer´s Sketchpad undanfarið. Ansi skemmtilegt forrit þar sem hægt er að framkvæma hinar ýmsu rúmfræðilegu mælingar. Er búinn að setja nokkur verkefni inn á heimasíðuna mína. Smelltu hér ef þú vilt skoða þau.

Mæla með því að þið skoðið þetta ansi skemmtilega myndband við lag NOFX "Idiot son of an A-hole". Smelltu hér til að sjá myndband.

Blessuð prófin

2003-11-18T11:36:00.000Z

Fór í heimsókn í Árbæjarskóla um daginn. Var að kynna mér notkun upplýsingatækni í skólastarfinu ásamt nokkrum samnemendum mínum. Okkur var þar bent á að nokkrir nemendur við skólann halda úti heimasíðu. Skoðaði síðuna núna um daginn og rakst þar á nokkuð skondið efni. Ég kem ekki til með að ráðleggja mínum nemendum að fara eftir þessu þegar ég verð orðinn kennari.
Smelltu hér til að sjá skondið efni

Hættur að drekka mjólk...

2003-11-15T15:34:00.000Z

Jæja. Þá er mjólkin farin að taka öskrandi á móti manni í verslunum.
"Gleðileg jól" segir hún.
"Gleðileg jól Böbbi minn".
Ha, um miðjan nóvember?

Baldur og Valur

2003-11-12T08:20:00.000Z

Þá er orðið ljóst hvar Balli Kúta leikur á næstu leiktíð í boltanum. Pilturinn skrifaði undir samning við Valsmenn í gær og mun leika með þeim í 1. deildinni. Hann mun sem sagt leika gegn sínum gömlu félögum í Völsa. Framtíð Baldurs hafði verið í nokkurrri óvissu og fjölmiðlar sífellt að fjalla um snáðann og velta vöngum yfir því hvert hann myndi fara. Á einhverjum fjölmiðli var talað um að Völsungur væri eitt af þeim liðum sem væri að reyna að fá hann í sínar raðir. Það hefði verið mikill liðsstyrkur. En Valur varð fyrir valinu.
Eitt af því sem ég sé eftir er að ég og Ómar félagi minn höfum ekki gert okkur pening úr þessu máli eins og við ætluðum að gera. Baldur var nefnilega með okkur (okkur=leikmenn Völsungs sem stunda nám í höfuðborginni) í fótbolta einu sinni í viku. Ég og Ómar ætluðum að senda fréttaskot á fjölmiðla þess efnis að Baldur hefði sést á æfingu með Völsungi og fá fyrir það nokkur þúsund eins og tíðkast með fréttaskot. En nú er of seint í rassinn gripið og við verðum að vera bláfátækir námsmenn enn um stund. Sjálfsagt hefur Baldur fengið einhvern pening fyrir að skrifa undir samning við Val (hef að vísu ekki hugmynd um það en af hverju ekki?). Nú er best að ég og títtnefndur Ómar sendum Baldri gíróseðil og rukkum hann um nokkur þúsund. Greiðsluna er svo hægt að inna af hendi í næsta banka eða sparisjóði.
Svei mér þá ef ég kaupi mér ekki bara pizzu fyrir peninginn!
Áfram Palace
p.s. Rétt er geta þess að Ómar getur ekki spilað sig frían í þessu máli.

Hvar á snjórinn heima?

2003-11-07T12:08:00.000Z

Heyrði lítinn strák spyrja mömmu sína þessarar spurningar í gær. Heyrði ekki hverju mamman svaraði en eflaust hefur sagt "hjá guði drengurinn minn". Eða þá að hún hafi sagt að snjórinn búi í skýjunum. Eðlileg svör og allt í góðu lagi með það.
Ég hins vegar hef ekki hugmynd um hvar snjórinn á heima. Og hvað þá helv... rigningin og rokið. Nú er búið að rigna þónokkuð hressilega síðustu daga í borg bleytunnar. Og rokið, rokið. Hvar skyldu þessir óvinir mínir búa? Eitt veit ég að rigningin og rokið eiga ekki heima hjá mér. Þess vegna ættu þau að láta mig í friði og vera ekki að abbast upp á mig. Ekki ryðst ég heim til þeirra og er með leiðindi. Nei, svo sannarlega ekki. Ég veit að vísu ekki hvar þau eiga heima, og þó ég vissi það myndi mér ekki detta hug að kíkja í heimsókn til þeirra.
Nei, burt með rigninguna og rokið. Það er kominn tími til að einhver kenni þeim mannasiði.

Æfingar hafnar

2003-11-06T23:03:00.000Z

Þá er undirbúningstímbil Völsunga fyrir næsta keppnistímabil formlega hafið. Fyrsta æfingin var á þriðjudag, smá spjall og létt skokk. Það eru 4 vaskir sveinar úr liðinu staddir sunnan heiða og munum við svitna saman í vetur. Áðan var svo fyrsta lyftingaæfingin, hætt við að maður fái smá strengi svona fyrst (gæti jafnvel leitt til þess að maður geti ekki bloggað). Ég held svei mér þá að íslenskir knattspyrnumenn séu þeir allra duglegustu, Íslandsmótið hefst í maí á næsta ári, þ.e.a.s. eftir rúma 6 mánuði. Það eru nokkrar æfingar þangað til.

Kember farinn

2003-11-04T09:44:00.000Z

Palace ráku knattspyrnustjórann sinn, Steve Kember, í gær. Allt gott um það að segja. Held svei mér þá að liðið þurfi ekki manager. Leikmennirinir eru náttúrulega einstaklega hæfileikaríkir og það að hafa manager er bara óþarfi, sóun á peningum. Palace er ekki ríkasta liðið svo ég sætti mig við þessa ákvörðun. Knattspyrnustjóri hefur aldrei unnið leik, nema hann sé að spila sjálfur sem er ekki algengt. Stjórinn horfir bara á og galar skipanir inn á völlinn og ég hef aldrei séð gal skora mark. Það þyrfti að minnsta kosti að gala ansi hátt. Annars held ég að leiðin liggi upp á við hjá palace (hvernig er annað hægt). Kember farinn, gott mál.
Og á meðan ég man. Hann lánaði Hayden Mullins til West Ham. HAYDEN MULLINS. Hvað er að svona mönnum. Mullins er einhver besti leikmaður í heimi, einstaklega fjölhæfur og traustur. Kember lánaði hann. Hvað er að?
Skamm Kember, svona gerir maður ekki.
Já skammastu þín Kember, skamm, skamm.
Snáfaðu og snautaðu Kember. Burt, burt. Farðu. Farðu langt.
Lifi Palace

Rétt hjá hverju(m)?

2003-10-27T17:12:00.000Z

Það er ekki alltaf auðvelt að vera utan af landi og búa í stórborginni henni Reykjavík. Ég kem frá Húsavík sem er talsvert minni um sig en höfuðborgarsvæðið. Þar eru færri hús, færri götur og færra fólk. Ég flutti fyrst suður haustið 2000 og hef haft vetursetu í borginni alla þá vetur sem síðan eru liðnir. Ég fer alltaf heim á sumrin til að hlaða batteríin og draga andann. Dvöl mín í borginni hefur verið nokkuð ánægjuleg, ég og kærastan erum að mennta okkur og líkar lífið bara vel. Þó er eitt sem er erfiðara (reyndar margt) við að búa í Reykjavík. Ég rata ekki jafnvel um borgina og innfæddir. Maður ætlar kannski að fara á einhvern ákveðinn stað að sækja í verslun eða þjónustu eða bara kíkja í heimsókn til vina og ættingja.
"Og hvert á ég að fara?" spyr ég stundum.
Viðmælandi minn segir "Komdu á Þykjustugötu 7".
"Og hvar er það?" spyr ég.
"Það er rétt hjá Alltíplatihúsinu".
Ég, smalinn, er engu nær. Alltíplatihúsið getur verið óravegu frá Þykjustugötu. Reykvíkingar hafa bara allt aðra tilfinningu fyrir fjarlægðum og vegalengdum en ég. Á Húsavík er hægt að tala um að eitthvað sé rétt hjá öðru. Ég að minnsta kosti skil hugtakið rétt hjá sem mjög nálægt. Kennaraháskólinn er ekki rétt hjá Kringlunni. Maður er heillengi að labba á milli þessara bygginga. Aftur á móti er Esso rétt hjá Kaupfélaginu. Þessu hef ég margoft lent í að innfæddir tali um að hitt og þetta sé rétt hjá hinu og þessu en það er það ekki í mínum huga. Ég held að stjórnvöld ættu að taka sér tak og setja fram almenna og viðurkennda skilgreiningu á rétt hjá og setja í lög. Þá væri lífið sko miklu auðveldara.
Er þetta ekki rétt hjá mér?

Eru jólin handan við hornið?

2003-10-24T10:26:00.000Z

Ruslpósturinn streymir stöðugt inn um bréfalúguna hjá manni. Ég hef í sjálfu sér ekkert á móti honum, hef lúmskt gaman af því að fletta hinum ýmsu auglýsingapésum. Þó er eitt sem er farið að fara ansi mikið í taugarnar á mér. Menn eru farnir að auglýsa jólavörur og jólaskraut. Bíðið nú við, er ég ekki með á nótunum? Það er 24.október hjá mér. En hjá ykkur? Jesú á afmæli 24. desember samkvæmt minni vitneskju. Reyndar hef ég heyrt ýmsar sögur um að blessaður drengurinn hann jesú hafi alls ekki fæðst 24.des. Ég hef reyndar ekki hugmynd um neitt í sambandi við jesú enda þekkti ég hann ekki. Þegar mér er boðið í afmæli er það sjaldnast með tveggja mánaða fyrirvara. Og umstangið er allt miklu minna. Ég efast um að ef ég fengi nokkrar verslanir í lið með mér og færi að auglýsa að ég ætti afmæli eftir tvo mánuði og það ætti að vera heljarinnar húllumhæ að nokkur maður tæki mig alvarlega. Jólin eru fín. Ég hef ekkert á móti þeim. En þau eru ekki fín tveimur mánuðum áður en þau koma. Þegar ég finn lyktina af jólasteikinni þá skal ég fyrst viðurkenna að jólin séu að koma.
Áfram Völsungur. Og Palace.

Áfram Ívar

2003-10-23T13:20:00.000Z

Jæja Íslendingurinn sá að sér. Ívar Ingimarsson ákvað að ganga ekki til liðs við Palace. Fór þess í stað til Reading. Ég skil þetta þannig að hann hafi ákveðið að leggja skóna á hilluna. Það er náttúrulega þannig að þegar menn hafa fengið tilboð frá Palace um að gerast leikmenn félagsins þá er toppnum náð. Lengra komast knattspyrnumenn ekki, nema þá kannski að fá að klæðast treyju félagsins. Gallinn með Ívar er bara sá að hann hefði aldrei komist í liðið hjá Palace. Þannig að hann sá að lengra kemst hann ekki í knattspyrnunni. Ívar hefur því eins og áður sagði lagt skóna á hilluna og ákveðið að einbeita sér þess í stað að lestri.

Nei, plís ekki annan Íslending

2003-10-22T14:41:00.000Z

Nú er mér hér um bil öllum lokið. Það hefur ekki verið að ganga neitt sérstaklega vel upp á síðkastið hjá mínum mönnum í Palace. Úrslit verið óhagstæð og Dougie Freedman verið að kólna upp við mark andstæðinganna en hann var eins og allir vita sjóðandi heitur í byrjun tímabilsins. Og nú eru menn að tala um að Palace hafi verið að gera tilboð í Ívar Ingimarsson hjá Wolves. Hvað er það eiginlega. Hann er ekki það sem langbesta félagslið í heimi þarf til að styrkja sinn leikmannahóp. Hann kemst ekki einu sinni í liðið hjá Wolves, og hefur aldrei gert. Ekki það að Wolves séu svo slæmir. Standardinn er bara allt annar hjá stórliði eins og Palace. Nei, nei og aftur nei. Ívar Ingimarsson leysir engan vanda. Íslendingur í fótbolta leysir engan vanda. Eru menn búnir að gleyma því þegar Palace fékk Íslending síðast til liðs við sig. Já sennilega eru flestir búnir að gleyma því, enda fáir sem hafa þær gáfur að bera að geta fylgst með jafn guðdómlega góðu knattspyrnuliði og Palace. Það er bara einn Íslendingur sem getur eitthvað í fótbolta í dag og það er ekki Ívar Ingimarsson.
Áfram Palace.

Á að stytta framhaldsskólann í þrjú ár?

2003-10-17T13:14:00.000Z

Um daginn voru kynntar hugmyndir um að stytta framhaldsskólann í þrjú ár. Best að tjá sig aðeins um það.
Ég held að stytting á framhaldsskólanámi í þrjú ár væri ekki breyting til batnaðar. Það er ansi hætt við því að það efni sem lagt yrði til grundvallar til stúdentsprófs yrði ekki í samræmi við styttingu námstímans. Þar af leiðandi yrði krafist meiri vinnu af nemendum með styttingunni (kannski ekki alveg rétt að fullyrða svona). Það er nú einu sinni þannig að brottfall meðal íslenskra framhaldsskólanema er eitthvert það mesta sem þekkist á Norðurlöndum og þó víðar væri leitað. Sífellt er verið að skrafa um það meðal ráðamanna hvaða leiðir séu færar til að sporna við brottfalli. Ef þær breytingar sem nú eru til umræðu um styttingu framhaldsskólanáms ná fram að ganga er þá ekki hætt við að fleiri nemendur hrekist úr skóla?
Einnig má benda á það að fyrir nemendur sem hefja nám í framhaldsskóla strax að loknu grunnskólanámi eru það yfirleitt talsverð viðbrigði. Þar eru gerðar auknar kröfur um að nemendur taki meiri ábyrgð á eigin námi og skipuleggi sitt nám sjálfir. Oft tekur það nemendur 1-2 ár að finna það hjá sjálfum sér hvaða aðferðir skili þeim árangursríku námi. Er þá eitt "gott" ár í framhaldsskóla nógu góður undirbúningur fyrir frekara nám?
Svo eru þessi ár bara svo andskoti skemmtilegur tími

Heimili

2003-10-15T21:44:00.000Z

Það styttist óðum í það að ég fái íbúð. Ég og kærastan höfum búið í herbergi hjá Pálmari, strák að norðan, sem er öðlingspiltur. Ekkert út á það að setja, nema maður verður svolítið leiður til lengdar á að búa í herbergi. Ég sótti um íbúð hjá Byggingafélagi námsmanna og fékk inni hjá þeim. Eini gallinn á þeirri íbúð var að það var ekki búið að byggja hana. Hafði svo samband við þá hjá BN, og viti menn, það má flytja inn þann 25. október. Ekkert að því. Skrifaði undir leigusamning í dag og renndi upp í Grafarholt og kíkti á íbúðina. Bankaði upp á hjá sjálfum mér. Góðleg kona kom til dyra og var hún vopnuð moppu. Hún var að þrífa íbúðina mína sem er mjög gott. Hún sagði mér að þetta væri í fjórða skipti sem hún væri að þrífa nákvæmlega þessa íbúð. Ekki ónýtt það, allt að verða stífbónað fyrir þingeyinginn knáa og frúna hans.

Morgunleikfimi

2003-10-10T10:27:00.000Z

Úff, ég er löngu vaknaður. Vaknaði reyndar klukkan 6. Var mættur í fótbolta í sporthúsinu klukkan 7. Þetta er náttúrulega bara rugl, en þetta var samt þrælgaman. Mjög góðmennt í morgun í boltanum og gaman að sjá gamla Völsunga á óeiginlegri æfingu hjá sínu gamla félagi (Balli Kúta og Guðni Rúnar). Annars voru aðrir leikmenn í þessum tíma Ási Arnars, Svavar, Mari, Simmi, Ingi Þröllabróðir og Blikinn Kristófer. Ég fékk snert af hjartaáfalli um klukkan 7:30 og bað um skiptingu. Kom svo tvíefldur til leiks og setti nokkur svona í morgunsárið. Stefnt er að því að framhald verði á þessum tímum. Líst ágætlega á það, það er erfitt að vakna en þetta er bara svo helvíti gaman.

In English, please.

2003-10-09T12:44:00.000Z

Jæja. Þá er enn einn dýrðardagurinn í borginni við hafið runnin upp og það reyndar fyrir nokkrum klukkutímum. Var að skoða skarp áðan og sá að það var snjór í mínum heimabæ. Mér finnst snjórinn fínn og væri alveg til á að vera heima að hnoða snjóbolta.
Annars var ég að uppfæra heimasíðuna mína áðan. Þar er nú hægt að finna ferilskrá og síðu á ensku sem inniheldur upplýsingar um mig. Skora á ykkur að kíkja á síðuna og kynnast hinum enska Bobby nánar.

Ölið í Serbíu

2003-10-08T08:19:00.000Z

Var að tala við góðan félaga minn um daginn. Hann er staddur í Serbíu þessa dagana. Hann sagði mér að bjórinn kostaði frekar lítið þarna úti eða bara svona 5-6 peninga með loðnu í mesta lagi á pöbbnum. Þá varð mér hugsað til þess þegar ég fór síðast út að skemmta mér í höfuðborginni. Á sumum stöðum er rukkað 700 krónur fyrir bjórinn. Það eru eins og talnaglöggir hafa komið auga á jafngildi 70 loðnu-peninga. Þetta jaðrar við að teljast mannréttindabrot.

Annars var ég að hlusta á Gas Huffer á leiðinni í skólann. Góð sveit. Þeir sungu "Oh man it´s cold, it´s really numbnuts cold, so say goodbye to summer breezes and get yourself back inside because it´s cold". Ég var þeim hjartanlega sammála og dreif mig inn í skóla í hlýjuna.

Palace á beinu brautina

2003-10-06T15:53:00.000Z

Jæja, þá unnu Crystal Palace loksins leik. Voru ekki búnir að vinna ansi lengi og maður var orðinn svolítið hræddur um að tímabilið var á leiðinni til ands#!*$%. En sigur um helgina fyllir mann von og vonin er magnað verkfæri. Vorum efstir eftir fjóra leiki í deildinni og nánast í fallsæti eftir níu leiki. Nú erum við komnir á beinu brautina. Enski meistaratitillinn er handan við hornið.
Áfram Palace

Persónulegur vefur

2003-10-02T11:32:00.000Z

Í Upplýsingatækni og skólastarf eigum við að bæta við vefinn okkar. Ég hef hugsað mér að bæta upplýsingasíðu á ensku við vefinn minn. Þar myndu koma fram upplýsingar um mig af ýmsum toga s.s aldur og fyrri störf, menntun, framtíðaráform o.s.frv. Það er orðið ansi langt síðan ég skrifaði eitthvað á ensku og gæti þetta orðið ansi forvitnilegt. Einnig hef ég hugsað mér að bæta við síðuna starfsferilskrá. Aldrei að vita nema maður eigi eftir að vísa á síðuna þegar maður sækir um vinnu næst.

Vefleiðangur

2003-10-02T09:28:00.000Z

Var rétt í þessu að ljúka við verkefni í námskeiðinu upplýsingatækni og skólastarf. Við áttum að útbúa svokallaðan vefleiðangur fyrir nemendur í grunnskóla. Verkefnið felst í því að nemendur eiga að nota netið við upplýsingaleit og leysa verkefni samhliða því. Ég útbjó verkefni sem gæti hentað miðstigi í grunnskóla (5.-7.bekk). Verkefnið fjallar um fugla í náttúru Íslands. Þú getur smellt hér til að skoða verkefnið.

Indestructible

2003-09-26T08:28:00.000Z

Fékk mér nýja diskinn með Rancid um daginn, indestructible heitir hann. Það eru liðin heil þrjú ár síðan rancid-liðar gáfu síðast út plötu og hefur biðin verið því verið löng. En biðin var þess virði. Rancid svíkja mann ekki núna frekar en fyrri daginn. Þessi plata er stútfull af slögurum og maður iðar í skinninu þegar maður hlustar á snilldina. Kraftmikið pönk-rokkið er sem fyrr grípandi og melódískt og nokkur laganna fær maður svo illþyrmilega á heilann að það jaðrar við að vera óþolandi, en er það samt ekki. Frá því að Rancid gáfu síðast út plötu hafa þeirra helstu lagasmiðir Tim Armstrong og Lars Fredriksen unnið að öðrum verkefnum. Tim stofnaði The Transplants ásamt nokkrum félögum sínum og gáfu Transplants út frábæra plötu í október í fyrra. Lars vann einnig að sérverkefnum með sveit sinni Lars Fredriksen and the bastards og gaf sú sveit út plötu í mars 2001. Mæli hiklaust með þessu góðgæti fyrir alla rokkþyrsta.

Uppkast að tæknisögu

2003-09-25T11:45:00.000Z

Smá hugmyndir um hvað er hægt að skrifa um:

GSM
Ég fékk mér GSM síma seinni part ársins 2001. Vinir og félagar höfðu þá margoft lýst yfir undrun og jafnvel vanþóknun á því hvers vegna ég væri ekki kominn með gemsa, sögðu að það væri bara ekki hægt að ná í mig. Ég taldi gemsana bruðl en nú er svo komið að ég get varla án hans verið.

Internetið
Ég er farinn að nota netið í talsvert meiri mæli en áður. Þó var það ekki fyrr en síðastliðinn vetur að ég fór að fara á netið með mjög reglulegum hætti. Það sem olli því var skólinn fyrst og fremst. Maður þurfti talsvert að nota netið í tengslum við námið og því urðu heimsóknir mínar á netið tíðari en áður.
Áður en ég hóf háskólanám var netnotkun mín fyrst og fremst bundin við það að versla tónlist í gegnum netið. Sú tónlist sem ég hlusta mest á fæst í flestum tilvikum ekki í búðum á Íslandi og því verslaði ég tónlist með hjálp tækninnar nokkrum sinnum á ári. Þrátt fyrir að vera mjög tónlistarlega sinnaður hef ég lítið gert af því að hlaða niður tónlist af netinu. Þau eru teljandi á fingrum annarrar handar lögin sem ég hef sótt á netið.
Í september í fyrra var svo í fyrsta skipti sem ég setti upp vef. Það var í tengslum við námið og gekk bara bærilega. Verst að ég hef verið mjög latur við að uppfæra hann.

Tölvupóstur
Það eru ekki mörg ár síðan ég sendi tölvupóst í fyrsta skipti, c.a 2-3 ár. Nú sendi tölvupóst endrum og eins og þá er það aðallega tengt skólanum á einhvern hátt. Ég geri mjög lítið af því að senda vinum eða ættingjum tölvupóst og notfæri mér þessa tækni í litlum mæli að því leyti. Þó hef ég tekið eftir því að þeim skiptum sem ég sendi tölvupóst af einhverjum öðrum ástæðum en í tengslum við námið fer fjölgandi. Spjallforrit á netinu nota ég aldrei. Hef aldrei farið inn á MSN og gæti ekki haft samband við vini í gegnum það forrit þó ég reyndi, þeir þyrftu að taka mig í kennslustund áður.

Önnur tækni
Hin ýmsustu tölvustýrðu tæki og tól s.s stafrænar mynda- og upptökuvélar eru ekki til á mínu heimili og satt að segja er ég alltaf dálítið smeykur við þessi tæki (maður heldur að ef maður ýti á einhvern rangan takka þá springi vélin). Það styttist þó í að maður láti það eftir sér að eignast slíkt því það bíður upp á ýmsa möguleika og maður yrði þá vafalaust duglegri við að taka myndir en nú er.

Í fréttunum

2003-09-23T08:26:00.000Z

Horði á fréttirnar á stöð tvö í gærkvöldi. Það er kannski í sjálfu sér fréttnæmt en ég hef bara mjög lítið fylgst með fréttum undanfarið. Það var ein frétt sem fékk mig til að hlusta sérstaklega vel. Þar sagði frá barni sem hafði orðið fyrir einelti í þeim skóla sem hún sótti. Málið var það slæmt að fjölskylda stúlkunnar þurfti að flytja úr bænum sem þau bjuggu í og setjast að annars staðar. Móðir þessarar stúlku kom í myndverið og sagði söguna og ræddi við fréttamenn. Þar kom í ljós að mikið af einelti krakkanna fór fram í gegnum sms-skilaboð. Nefnd voru dæmi um það sem stúlkan fékk sent frá skólafélögum sínum og var það með því ljótara sem maður hefur heyrt og maður skilur ekki hvernig börn geta sagt svona hluti. Ég er ekki viss um að ég hafi kunnað svona ljót orð þegar ég var krakki (maður er að vísu helv... fljótur að gleyma). Ég held að þeir sem nú stunda nám við kennaraskólann og aðrir sem koma að skólamálum á einhvern hátt, sem eru sjálfsagt allir landsmenn, ættu að setja sér það markmið að leggja eineltið í einelti og útrýma því úr íslensku samfélagi í eitt skipti fyrir öll. Mikið yrði heimurinn góður.

Letilíf

2003-09-22T08:14:00.000Z

Jæja, þá er helgin búin. Get ekki sagt með góðri samvisku að ég hafi verið að drepast úr dugnaði um helgina. Fór varla út úr húsi. Skellti mér þó á leik í 1.deildinni í handboltanum á föstudagskvöldið. Sá Valsmenn rétt merja Aftureldingu 24-23. Þetta var prýðisskemmtun og ég á án efa eftir að kíkja á handboltann meira í vetur. Svo kom laugardagurinn og ég nennti engu. Fór ekki út úr húsi og rétt nennti að anda. Mjög góður dagur og alveg nauðsynlegt að taka svona daga af og til. Sunnudagurinn var mjög svipaður nema hvað að ég brunaði út í Hagkaup rétt fyrir lokun og keypti hrísgrjón. Góður matur hrísgrjón. En til að gera langa sögu stutta þá ætlaði ég að vera búinn að uppfæra síðuna um helgina. Ég bara nennti því ekki.

Verkefni í PowerPoint

2003-09-19T13:42:00.000Z

Ég, Katrín og María höfum ákveðið að vinna saman að þessu verkefni. Við höfum hugsað okkur að útbúa kynningu á námsefninu Geisli 1A og Geisli 1B. Kynningin er hugsað fyrir foreldra þeirra nemenda sem eru í 5.bekk grunnskóla en efnið er kennt þar. Ástæðan fyrir því að við völdum þetta er að Geisla-efnið er nýtt námsefni og eru talsvert breyttar áherslur í því frá fyrra námsefni. Við ætlum að kynna fyrir foreldrum breyttar áherslur í náminu, nýja nálgun á viðfangsefnið og breytt vinnubrögð sem foreldrar ef til vill þekkja ekki. Þetta lítur allt saman ágætlega út og gengur vonandi vel.

Merðir á Spáni

2003-09-19T08:18:00.000Z

Það hefur víst ekki farið framhjá neinum að það er farið að hausta. Hitastigið sem stekkur í fangið á manni á morgnana segir allt sem segja þarf. Fær mig til að hugsa til þess að í gær kvaddi ég nokkra félaga mína með tár á kinn en þeir voru á leið til Spánar að spóka sig í sólinni í nokkra daga. Ég er ekki þar með að segja að ég sé einhver sólardýrkandi. Þvert á móti. Gula fíflið er einn af mínum verstu óvinum (þarf að taka það fram að þessi óvinur sé vondur, eru ekki flestir óvinir það, þessi er bara á topp fimm svo ég ákvað að skeita þessu litla lo. framan við). Væri samt alveg til í að vera með þeim og þá eingöngu til að njóta félagsskapar þeirra en ekki sólarinnar. Svo er mér líka svo rosalega kalt á puttunum.

Lokahóf meistaraflokks Völsungs

2003-09-15T16:05:00.000Z

Ég skellti mér norður um helgina og fór á lokahóf Völsunga. Þetta var prýðis skemmtun og glatt á hjalla enda voru menn að fagna lokum á góðu keppnistímabili. Dagskrá hófsins var nokkuð góð og flest atriðin á mjög léttum nótum m.a. voru ýmis spaugileg atvik frá nýliðnu tímabili rifjuð upp, stjörnumessan var á sýnum stað og óborganleg myndasýning var í lok dagskrár. Það sem einna hæst bar var þegar leikmenn kusu besta leikmann sumarsins og þann efnilegasta. Fyrir valinu urða Boban Jovic, bestur, og Baldur Sigurðsson sem valinn var efnilegastur. Flestir voru sammála um að þessir leikmenn væru vel að titlunum komnir. Það var einna helst að menn hefðu viljað sjá hinn heimsþekkta glaumgosa frá Júgóslavíu, Nikola Niksic, fá verðlaun sem sá efnilegasti. Einnig var haft orð á því að Baldur væri sennilegasti efnilegasti leikmaður í heimi þar sem hann hefur hlotið þessa nafnbót undanfarin þrjú ár, en hann á þetta svo sannarlega skilið blessaður. Hann er líka einn efnilegasti höstler félagsins og varð honum þó nokkuð með mágkonu minni seinna um kvöldið en förum ekki nánar út í það. Til að gera langa sögu ekki mikið lengri var mikið drukkið og sungið og trallað og allir fóru sáttir heim og geta ekki beðið eftir því að hefja undirbúning fyrir komandi keppnistímabil í fyrstu deildinni.
Áfram Völsungur!

Enski boltinn

2003-09-12T08:33:00.000Z

Las í gær að samningur Norðurljósa við eitthvað fyrirtæki um sýningarrétt á enska boltanum rennur út í lok þessarar leiktíðar. Í sömu frétt var greint frá því að RÚV og Skjár1 væru að ræða sín á milli um að bjóði saman í sýningarréttinn. Ég verð að viðurkenna að ég get ekki hugsað þá hugsun til enda að enski boltinn rúlli yfir á RÚV aftur. Held að RÚV ætti að fara að einbeita sér alfarið að íþróttum sem krefjast þess að knöttur komi hvergi við sögu, jafnvel að fela Norðurljósum allar íþróttir. Munurinn á íþróttaefninu sem stöðvarnar bjóða upp á er stjarnfræðilegur og Norðurljós hafa vinninginn verð ég að segja. Það eina sem mætti gagnrýna Norðurljós fyrir er að sýna ekki meira af leikjum með Crystal Palace. Ef þeir leikir væru sýndir væri íslensku þjóðfélagi borgið, svo lipur er fótaburður Palace-manna.

Vefrallý

2003-09-10T15:02:00.000Z

Nota Fjaran og hafið sem er að finna á vef námsgagnastofnunar. Gæti verið inngangur að frekari umfjöllun um lífríkið í fjörunni og hafinu í kringum Ísland. Einnig gæti verkefnið hentað ef til stæði að fara í stutta fjöruferð með nemendum.
Hugmyndir að spurningum fyrir vefrallý:
Hvað er grunnsævi?
Hvað fæst mikið magn af æðardúni á landinu öllu árlega?
Á ýsunni er svört rák, hvaðan er talið að sú rák komi?
Hvar lifir humarinn við Ísland?
Hvað er purpurahimna?
Hvað borðar landselur?
Hvaða tvær stofnanir unnu efnið sem er að finna á vefnum?
Hvert er annað nafn á teistum?
Hver er stærsti ránfugl landsins?
Hversu stór og þungur er kálfur hrefnunnar við burð?
Hvað er hringnót?
Hvernig er Þykkvalúra á litinn?
Lundar hafa stundum verið kallaðir prófastar, hvers vegna?
Hvaða fjórar tegundir sela koma reglulega til landsins á ferðum sínum?
Hvar lifir trjónukrabbi?

Vefir fyrir kennara + leikir

2003-09-10T14:12:00.000Z

Það er alltaf að færast í vöxt að efni sem varðar nám og kennslu sé orðið aðgengilegt á netinu. Efnið er ýmist sniðið að þörfum kennara, nemenda eða ætlað báðum aðilum. Alhliða upplýsingar er varða skólastaf er að finna á menntagatt.is. Þeim vef er ætlað það hlutverk að veita alhliða upplýsingar um skólastarf. Þar er að finna upplýsingar um skóla, námsframboð, gagnvirkt efni og margt fleira.
Á netinu er einnig að finna fjöldann allan af leikjum sem hægt er að spila í gegnum netið. Ég rakst á einn frábæran leik sem ég spilaði svolítið sem unglingur hjá Krilla, Bubble Trouble heitir leikurinn og er hann að finna hér. Að vísu er leikurinn í örlítið breyttri útgáfu frá því ég spilaði hann, en engu að síður er þetta frábær skemmtun.

Samskiptakerfi - spjallkerfi

2003-09-10T13:55:00.000Z

Á netinu er að finna ótal marga vefi þar sem fólki gefst kostur á því að spjalla um allt milli himins og jarðar sín á milli. Einkamál.is er dæmi um slíkan vef. Þar gefst fólki kostur á því að kynnast hvort öðru með hjálp nýjustu tækni. Á malefnin.com er að finna annað spjallkerfi. Þar gefst notendum kostur á að taka þátt í almennri þjóðfélagsumræðu um hvað sem er, hvort sem það eru viðskipti, trúmál, íþróttir, pólitík eða bara hvað sem er.
Að lokum má ég til með að nefna rokk.is. Vefurinn fjallar um íslenska tónlist og þar gefst íslenskum hljómsveitum tækifæri til að kynna tónlist sína öðrum. Á vefnum er einnig spjallborð sem eðli málsins samkvæmt fjallar að mestu leyti um tónlist á Íslandi. Ég skora á alla þá sem hafa áhuga á íslenskri tónlist að kíkja á þennan vef.

Völsi í fyrstu deild!

2003-09-08T16:15:00.000Z

Völsungur frá Húsavík (mitt lið í boltanum) spilaði síðasta leik sinn í íslandsmótinu í gær, sunnudag. Mótherjarnir voru Selfoss og sigruðu Völsungar 1-0. Andri Valur gerði markið með glæsilegum skalla eftir vel útfærða sókn. Að leik loknum var Völsungum afhentur sjálfur Íslandsmeistaratitillinn og var honum vel (og verðskuldað) fagnað. Nú er bara að vona að Völsi fylgi þessum góða árangri eftir og geri það gott í fyrstu deild að ári.
Áfram Völsungur

Æfing í tengingum

2003-09-03T15:09:00.000Z

Ég er húsvíkingur að upplagi og mér finnst alveg nauðsynlegt að geta fylgst með fréttum að norðan. Skarpur.is er síða sem uppfyllir þessa þörf mína. Auk frétta er að finna ýmislegt annað glens og gaman á Skarpnum.
Tónlist hefur alltaf skipað stóran sess í mínu lífi og ég hlusta óhemju mikið á tónlist. Útgáfufyrirtækið Epitaph sér mér fyrir mestu af þeirri tónlist sem ég hlusta á.

Fyrsti tíminn + fyrsta bloggið

2003-09-03T14:51:00.000Z

Jæja, hver hefði trúað þessu, ég er kominn með mína eigin bloggsíðu. Þessi "ég" er Björgvin Sigurðsson og er 25 ára gamall þingeyskur nemandi við Kennaraháskóla Íslands. Ég er á öðru ári í skólanum og líkar bara þrusuvel. Þessi bloggsíða er hluti af námskeiði sem ég sæki við skólann og ber heitið Upplýsingatækni og skólastarf. Sem nemandi á öðru ári við KHÍ hef valið mér kjörsvið. Það kjörsvið sem varð fyrir valinu er stærðfræði og eftir þrjá daga á kjörsviðinu get sagt með þónokkuð góðri samvisku að mér lítist bara vel á veturinn.